ठाणे (1) रोज एक एक प्रभाग समितीची पाहणी करून तेथील कोरोना कोवीड 19 ची परिस्थिती समजून घेण्याबरोबरच इतर कामाचा आढावा घेण्याचा दिनक्रम सुरू केलेल्या महापालिका आयुक्त डॅा विपिन शर्मा यांनी आज जवळपास चार तास नौपाडा प्रभाग समिती पिंजून काढली. या पाहणी दौऱ्यात त्यांनी कोरोना मुक्त झालेल्या कोवीड योद्ध्यांशीही संवाद साधून त्यांची विचारपूस केली.
आज सकाळी दहा वाजता महापालिका आयुक्तांनी महापौर नरेश गणपत म्हस्के यांच्या समवेत कोपरी आनंदनगर परिसराची पाहणी केली. या भेटीत त्यांनी आनंदनगर येथे सुरू असलेले फिव्हर क्लिनिक, सार्वजनिक शौचालये, तसेच गल्ल्यांमध्ये जावून तेथील स्वच्छता, साफसफाई, नाले सफाई आदींची पाहणी केली.
यानंतर त्यांनी चेंदणी कोळीवाडा प्रतिबंधिक क्षेत्राची पाहणी केली. चेंदणी कोळीवाडा परिसरात त्यांनी एकविरा देवी मंदीर, विठ्ठल मंदीर रोड, स्व. नारायणराव कोळी चौक, कोळीवाडा गाव, मीठबंदर रोड, चंद्रकांत नाखवा कोळी चाळ, सिमेंट गल्ली, युनायटेड स्पोर्टस, आनंदभारती, हरियाली तलाव, राऊत शाळा या परिसराची पाहणी केली. तसेच या परिसरातील कोरोनामुक्त रूग्णांच्या घरांना भेटी देवून त्यांच्याशी विचारपूस केली. यावेळी त्यांच्यासमवेत नगरसेवक भरत चव्हाण, स्थानिक नेते रमाकांत पाटील, माजी नगरसेवक गिरीष राजे, श्रुतिका मोरेकर आदी उपस्थित होते.
चेंदणी कोळीवाड्यानंतर डॅा. शर्मा यांनी बी केबीन, रेल्वे लाईन येथील प्रतिबंधीत क्षेत्राची पाहणी केली. तसेच येथील कोरोनामुक्त झालेल्या कोवीड योद्ध्यांची विचारपूस केली. यावेळी त्यांच्यासमवेत ज्येष्ठ नगरसेवक संजय वाघुले, नगरसेवक सुनेश जोशी, नगरसेविका सौ. मृणाल पेंडसे, सौ. नम्रता कोळी आदी उपस्थित होते. त्यानंतर जांभळी नाका मुख्य धान्य बाजाराची फिरून पाहणी केली. तसेच नागसेन नगर, खारटन रोडचीही पाहणी केली. या ठिकाणी स्थानिक नगरसेवक सुधीर कोकाटे, सुनील हंडोरे आदी उपस्थित होते.
यावेळी डॅा. शर्मा यांनी हाजुरी, मनोरूग्णालय परिसराची पाहणी करून तेथील माहिती जाणून घेतली. यावेळी त्यांच्यासमवेत स्थानिक नगरसेवक तथा शिक्षण समिती सभापती विकास रेपाळे, नगरसेविका सौ. नम्रता फाटक, माजी नगरसेविका आणि वृक्ष प्राधिकरण समिती सदस्या सौ. नम्रता भोसले आदी उपस्थित होते.
या दौऱ्यात महापालिका आयुक्तांसमवेत अतिरिक्त आयुक्त संजय हेरवाडे, उप आयुक्त संदीप माळवी, अशोक बुरपल्ले, माहिती व जनसंपर्क अधिकारी महेश राजदेरकर, सहाय्यक आयुक्त प्रणाली घोंगे, कार्यकारी अभियंता श्री. अमृतकर आदी उपस्थित होते.
चौकट
वृद्धाच्या मदतीसाठी धावले महापालिका आयुक्त
चेंदणी कोळीवाडा येथे महापालिका आयुक्तांचा पाहणी दौरा सुरू असतानाच एका स्थानिक व्यक्तींने रस्त्यावर एक वृद्ध गृहस्थ पडला असल्याचे सांगताच महापालिका आयुक्तांनी तात्काळ धाव घेवून त्याला पाणी पाजण्यास सांगितले. तसेच त्याला रूग्णवाहिका बोलावून तातडीने निवारा केंद्रात नेण्याचे आदेश दिले.
फोटो ओळ
1. महापालिका आयुक्त डॅा. विपिन शर्मा यांनी आज महापौर नरेश गणपत म्हस्के यांच्या समवेत आनंदनगर कोपरी परिसराची पाहणी केली.
2. चेंदणी कोळीवाड्याची पाहणी करताना महापालिका आयुक्त. सोबत नगरसेवक भरत चव्हाण, माजी नगरसेवक गिरीष राजे, स्थानिक नेते रमाकांत पाटील.
3. बी केबीन, रेल्वे लाईन परिसराची पाहणी करून कोरोनामुक्त व्यक्तींशी संवाद साधताना.
4. महापागिरी मुख्य धान्य मार्केट, नागसेन नगर तसेच मनोरूग्णालय परिसराची पाहणी करताना.
